Illallinen Suomen taihvaan alla

Turtolan taihvaan alle kerräänty alun neljättä kymmentä illallistajaa.

Onnea 100-vuotihaale!

Turtolassa juhlithaan tänhään merkittävvää ikkää. Turtolan Martat ry täyttää 100 vuotta.

Sen kunniaksi kirkossa on klo 17 juhlakonsertti ja seurakuntakoila juhlakahvit.

Kyläyhistys toivottaa onnea ja menestystä seuraavalleki 100 vuojele!

Koulunmäelä porathaan

9 metrin jälkhiin alko kallio.

Lämpökaivoja on alettu porraahmaan eilen ja päästiin 170 methriin. Ens viikola purethaan vanha vesivarraaja pois ja tuohaan uuet laitheet tilale. Vanha öljypannu jää toistaseksi hätävaraksi. Näin se homma hoituu, ko on ammattilaiset asialla.

Urakasta vastaa Mine Partner Oy eli lähempää ei tekijää olis voinu löytyä. Siitä olema kans oikhein mielissään!

Maalämpöhanke on hyväksytty Elyssä

Lämpöä Turtolan koulunmäelle -hanke on saanu Elystä hyväksytyn päätöksen. Outokaira Tuottamhan -Leaderrahoitusta saahaan maksimimäärä, 60% kustannuksista. Näyttää siis siltä, että viiminen öljytilaus koulule on nyt tehty ja syksystä menhään maalämmölä!

Suvilinnun lauluja museolla

Museolla äähneen pääsi alun kolmekymmentä laulajaa.

Suvilinnun lauluja laulethiin viimevuotisseen taphaan museon pihala. Tästähän vaikuttaa tulevan mukava perinne. Otamako ens vuona taas uusiksi?

Lauluilta sattu kuvataitheen päiväle. Knuutin Juha kertoili sen kunniaksi meile Suomen arvostetuimmasta kuvataiteilijasta, Helene Schjerfbeckistä.

Kovin arvostetulta Helene ei kuitenkhaan elläissään vaikuttanu. Oli liian moterni takapajusille suomalaisile. Ja vielä hameväkeä. Edelfeltin Alberttikhaan ei antanu ko suklaarasian maalauspalkaksi taulusta, josta hän itte kuitenki pulitti käyvän summan. Mokomaki!

Juha oli laskenu, että Schjerfbeckin nimessä on kaks vokaalia ja yheksän konsonanttia! Ei se kauhean helppo ole meän kielelä lausuakhaan.